પર્યાવરણને બચાવવા તેમજ પેટ્રોલ અને ડીઝલના ભાવ આસમાને પહોંચતાં હાલમાં જ ઈલેક્ટ્રિક કાર સહિત ઈલેક્ટ્રિક સ્કૂટર પર ભાર મૂકવામાં આવી રહ્યો છે. આ વચ્ચે જ ઈલેક્ટ્રિક સ્કૂટરની સેફ્ટીને લઈને અનેક સવાલો ઉભો કરતો એક વીડિયો સોશિયલ મીડિયામાં વાઈરલ થઈ રહ્યો છે. જેમાં ઈલેક્ટ્રિક સ્કૂટરમાં બેટરી ફાટ્યા બાદ આગ ભભૂકી ઉઠી હતી, જેને કારણે અફરાતફરીનો માહોલ સર્જાઈ ગયો હતો.
અત્યાર સુધી સ્માર્ટફોનની બેટરી ફાટવાના કિસ્સા સામે આવતાં હતા. હાલમાં ઈલેક્ટ્રિક સ્કૂટરનું વેચાણ પણ વધ્યું છે. તેવામાં વાઈરલ થયેલાં વીડિયોમાં જોઈ શકાય છે કે, ઈ-સ્કૂટરની બેટરી ફાટવાથી કેટલી ભયાનક દુર્ઘટના થઈ શકે છે. ટ્વીટર પર આ વીડિયો શેર કરવામાં આવ્યો છે. જેમાં જોઈ શકાય છે કે, પાર્ક કરેલાં સ્કૂટરમાં કેવી રીતે આગ ભભૂકી ઉઠે છે.
વાઈરલ વીડિયોમાં સ્કૂટરમાં સૌથી પહેલાં ધૂમાડાઓ નીકળતાં જોઈ શકાય છે. અને બાદમાં તેમાં આગ ભભૂકી ઉઠે છે. જો કે, અત્યાર સુધી કોઈ માહિતી સામે આવી નથી કે, આખરે ઈલેક્ટ્રિક સ્કૂટરમાં આગ કેવી રીતે લાગી. આ ઉપરાંત કોઈએ ઈલેક્ટ્રિક સ્કૂટરની સર્કિટમાં છેડછાડ કરી હતી કે કેમ તે અંગે પણ માહિતી પ્રાપ્ત થઈ શકી નથી. જેથી ઈલેક્ટ્રિક સ્કૂટરની સુરક્ષાને લઈને સવાલો ઉભા કરી ન શકાય. પણ સોશિયલ મીડિયામાં વીડિયો વાઈરલ થતાં યુઝર્સ ચોંકી ઉઠ્યા હતા અને જણાવી રહ્યા હતા કે, ઈલેક્ટ્રિક સ્કૂટરમાં બેટરી ફાટતાં તે જીવલેણ સાબિત થઈ શકે છે.
ટ્વિવટર પર વીડિયો વાઈરલ થયા બાદ લોકોએ આ ઈલેક્ટ્રિક સ્કૂટરની કંપનીની ઓળખ કરી લીધી હતી. આ ઈલેક્ટ્રિક સ્કૂટર ઈપ્લુટો નામનું છે, કે જે પ્યોર ઈવી નામની સ્ટાર્ટ અપ કંપની દ્વારા બનાવવામાં આવે છે. બે વર્ષ અગાઉ આઈઆઈટી હૈદરાબાદમાંથી આ સ્ટાર્ટ અપની શરૂઆત થઈ હતી. અને છેલ્લા 18 મહિનામાં 25 હજારથી વધારે ઈલેક્ટ્રિક સ્કૂટર વેચ્યા હોવાનો દાવો કરવામાં આવી રહ્યો છે.
ઉલ્લેખનીય છે કે, છેલ્લા થોડા વર્ષોમાં દેશમાં ઈલેક્ટ્રિક ટૂ વ્હીલરની અનેક કંપનીઓ શરૂ થઈ ચૂકી છે, જેમાં ઓછી કિંમતે ઈલેક્ટ્રિક સ્કૂટર ઓફર કરવામાં આવે છે. તેની અંદર મોટી લિથિયમ આયન બેટરી આપવામાં આવે છે, પણ દેશમાં ઘણી જ ઓછી કંપનીઓ એવી છે કે જે આ સ્કૂટરની સુરક્ષા અંગે જાણકારી પૂરી પાડે છે.
