વાર્ષિક આવક આઠ લાખથી ઓછી અને 15 વર્ષથી ગોવામાં રહેતાં હોય તેવા લોકોને વળતર મળશે
ગોવા સરકારે એક યોજનાનું એલાન કર્યું છે જે મુજબ કોરોનાથી મોતને ભેટનારા પરિવારજનોને આર્થિક મદદ કરવામાં આવશે. આ જાણકારી રાજ્યના સોશ્યલ વેલફેર ડાયરેક્ટર ઉમેશ ચંદ્ર જોશીએ જાહેર કરી છે. પાછલા મહિને મુખ્યમંત્રી પ્રમોદ સાવંતે આ અંગેની જાહેરાત કરી હતી.
સરકાર દ્વારા આ યોજનાને લઈને જાહેર કરવામાં આવેલા જાહેરનામા અનુસાર કોવિડ-19થી મોતને ભેટનારા લોકોના પરિવારજનો કે જેમની વાર્ષિક આવક આઠ લાખ રૂપિયાથી ઓછી છે તેમને એક વખત બે લાખ રૂપિયાનું વળતર ચૂકવવામાં આવશે. પ્રત્યેક પીડિત પરિવારમાંથી એક જ વ્યક્તિ દાવો કરી શકશે. જાહેરનામામાં એવું પણ જણાવાયું છે કે લાભાર્થી છેલ્લા 15 વર્ષથી ગોવાનો રહેવાસી હોવો જોઈએ.
કોરોના પીડિતોને કેન્દ્ર તરફથી ચાર લાખ રૂપિયાનું વળતર આપવાના મામલે સુપ્રીમ કોર્ટની 3 જજની બેન્ચે રાષ્ટ્રીય આપત્તિ નિવારણ ઓથોરિટીને આદેશ આપ્યો છે કે તેઓ કોરોના સંક્રમણથી મોતને ભેટનારા લોકોના પરિવારજનોને વળતર આપવા માટે છ સપ્તાહની અંદર દિશા-નિર્દેશ તૈયાર કરે. વળતરની રકમ નિર્ધારિત ન કરતાં કોર્ટે કહ્યું કે આ નિર્ણય રાજ્ય સરકારોએ લેવાનો રહેશે. કોર્ટે વળતર આપવું બંધારણીય કર્તવ્ય ગણાવ્યું હતું.
ઉલ્લેખનીય છે કે ગોવામાં 12 જૂલાઈ સુધી કર્ફયુ લંબાવી દેવામાં આવ્યો છે. આ દરમિયાન દુકાનો સવારે 7 વાગ્યાથી સાંજે 6 વાગ્યા સુધી ખોલવાની પરવાનગી આપવામાં આવી છે. રાજ્યના હેર સલૂન અને આઉટડોર સ્પોર્ટસ કોમ્પલેક્સ-સ્ટેડિયમને પણ ખોલવામાં આવી શકે છે.
