આજકાલ લક્ષદ્વીપની ખૂબ ચર્ચા થઈ રહી છે. જો તમે પણ પોતાના પરિવાર, પાર્ટનર કે મિત્રો સાથે અહીં ફરવાનો પ્લાન બનાવી રહ્યા હો તો કેટલીક ખાસ માહિતી આપવામાં આવી છે. લક્ષદ્વીપ કઈ રીતે જવું, કેટલો ખર્ચ થશે, ક્યાં-ક્યાં ફરી શકાય અને કઈ-કઈ એક્ટિવિટી થઈ શકે એ બધી જ માહિતી આપવામાં આવી છે.
આજકાલ દેશમાં લક્ષદ્વીપને લઈને ભારે ચર્ચા થઈ રહી છે. પીએમ મોદીએ લક્ષદ્વીપનો પ્રવાસ કર્યા પછી દેશવાસીઓને પણ અહીં ફરવાની સલાહ આપી છે. જે બાદ લોકો સોશિયલ મીડિયા પર લક્ષદ્વીપની સુંદર તસવીરો શેર કરી રહ્યા છે અને તેની સ્વચ્છતાના પણ વખાણ કરી રહ્યા છે. કેટલાય લોકોએ આગામી દિવસોમાં લક્ષદ્વીપ ફરવા જવાનો પ્લાન પણ બનાવી લીધો છે. જો તમે પણ વિચારી રહ્યા હો કે લક્ષદ્વીપ ક્યારે જવું, કેવી રીતે જવું, રૂટ શું, કેટલો ખર્ચ થશે અને ત્યાં જઈને ક્યાં-ક્યાં ફરવું? તો આ બધી જ માહિતી અહીં તમને આપીશું.
લક્ષદ્વીપ કેવી રીતે પહોંચશો?
જો તમે હવાઈ મુસાફરી કરીને લક્ષદ્વીપ જવા માગો છો તો કોચ્ચીના અગત્તી એરપોર્ટ માટે ફ્લાઈટ ટિકિટ બુક કરાવવી પડશે. કોચ્ચીથી લક્ષદ્વીપ જવાનું આ એકમાત્ર એરપોર્ટ છે. અગત્તી દ્વીપ પહોંચ્યા પછી તમે બોટ કે હેલિકોપ્ટર થકી અન્ય ટાપુઓની યાત્રા સરળતાથી કરી શકો છો. લક્ષદ્ધીપ માટે એરલાઈન કંપનીઓ ડાયરેક્ટ ફ્લાઈટ પ્રોવાઈડ કરે છે. જો તમે અમદાવાદથી લક્ષદ્વીપની ફ્લાઈટની એક ટિકિટની ઓછામાં ઓછી કિંમત 13 હજાર રૂપિયા થશે.
કેટલો ખર્ચ થશે?
જો તમે યોગ્ય પ્લાનિંગ કરીને એક મહિના પહેલા જ લક્ષદ્વીપ માટે ફ્લાઈટ ટિકિટ બુક કરાવી લેશો તો થોડી સસ્તામાં પડી શકે છે. ફ્લાઈટ ટિકિટ બુક કરતી વખતે ક્રેડિટ કાર્ડનો ઉપયોગ કરીને પેમેન્ટ કરવાથી પણ ડિસ્કાઉન્ટ ઓફર મળી શકે છે. લક્ષદ્વીપના ટુર પેકેજની વાત કરીએ તો, મુસાફરીને બાદ કરતાં એક વ્યક્તિ માટે 25થી 30 હજાર રૂપિયાનો ખર્ચ થઈ શકે છે. જોકે, તમારા રોકાવાના દિવસો અને હોટેલ પ્રમાણે આ ખર્ચમાં વધારો-ઘટાડો થઈ શકે છે.
કયા મહિનાઓમાં જવું?
આમ તો આખા વર્ષ દરમિયાન ગમે ત્યારે લક્ષદ્વીપની મુલાકાત લઈ શકો છો પરંતુ અહીં ફરવા માટે ઓક્ટોબરથી માર્ચ મહિનાનો ગાળો બેસ્ટ ગણાય છે. ઉનાળામાં પણ અહીં વાતાવરણ ખુશનુમા રહે છે એટલે ફરવાની મજા આવશે.
કઈ એક્ટિવિટી કરી શકો?
લક્ષદ્વીપ જઈને શાંત અને સ્વચ્છ સમુદ્ર તટ પર સવારે કે સાંજે ટહેલવાનો આનંદ લઈ શકો છો. અહીંના સુંદર નજારા તમારી ટ્રીપને યાદગાર બનાવી દેશે. લક્ષદ્વીપ એડવેન્ચર એક્ટિવિટીઝ માટે પણ જાણીતું છે. અહીં તમે સ્નોર્કલિંગ, સ્કૂબા ડાઈવિંગ, વોટર સર્ફિંગ, કાયાકિંગ, કેનોઈંગ કરવાની મજા માણી શકો છો.
ક્યાં-ક્યાં ફરી શકાય?
લક્ષદ્વીપના ફરવાલાયક સ્થળોની વાત કરીએ તો તમે કવરાત્તી આઈલેન્ડ, અગત્તી આઈલેન્ડ, પિટ્ટી બર્ડ સેન્ચુરી, અમીની બીચ, મિનિકોય આઈલેન્ડ વગેરે જેવા સ્થળોની મુલાકાત લઈ શકો છો. આ સ્થળો વિશે હવે થોડી વિગતવાર માહિતી જણાવી દઈએ.
કવરાત્તી આઈલેન્ડ
સફેદ રેતવાળા આ આઈલેન્ડ પરથી સનસેટને માણી શકો છો. કવરાત્તી આઈલેન્ડમાં તમે ઓછામાં ઓછું બે દિવસ રોકાણ કરી શકો છો. જો તમે શહેરની ભાગદોડવાળી જિંદગીથી થાકીને આરામ કરવા આવ્યા હો તો અહીં રોકાઈ શકો છો. શાંતિનો અનુભવ કરવા માટે આ સારી જગ્યા છે. અહીં તમે પરિવાર કે પાર્ટનર સાથે જઈ શકો છો.
મિનિકોય આઈલેન્ડ
મિનિકોય આઈલેન્ડ ખાતે પણ બે દિવસનું રોકાણ કરી શકો છો. અહીં સાઈટ સીઇંગ ઉપરાંત બોટ રાઈડની મજા માણી શકો છો. હાઈકિંગ માટે પણ આ જગ્યા સારી છે.
મરીન મ્યૂઝિયમ
સમુદ્રની અંદરની જીવનસૃષ્ટિ કેવી છે તે તમને આ મ્યૂઝિયમમાં આવીને ખબર પડશે. મરીન મ્યૂઝિમમાં શાર્કના હાડપિંજરથી લઈને અનેક માછલીઓ જોવા મળશે. અહીં એક-બે કલાક રોકાઈ શકો છો અને મરીન લાઈફની જાણકારી મેળવી શકો છો.
પિટ્ટી બર્ડ સેન્ચુરી
જો તમે કાલ્પેની આઈલેન્ડ પર રોકાયા હો તો નાનકડી બોટ લઈને પિટ્ટી બર્ડ સેન્ચુરી જઈ શકો છો. આ નાનકડા ટાપુ પર તમને વિવિધ પ્રજાતિના પક્ષીઓ જોવા મળશે. સ્નોર્કલિંગ માટે પણ આ સારી જગ્યા છે. પક્ષીઓ જોવા માટે અહીં 2-3 કલાક રોકાઈ શકો છો.
અમીની બીચ
સ્કૂબા ડાઈવિંગ માટે લક્ષદ્વીપનો અમીની બીચ પોપ્યુલર છે. આ બીચ પર જુદા-જુદા પ્રકારની એડવેન્ચર એક્ટિવિટી થઈ શકે છે. સ્કૂબા ડાઈવિંગ ઉપરાંત અહીં સ્નોર્કલિંગ, રીફ વૉકિંગ અને કાયાકિંગની મજા લઈ શકો છો. અહીં 6-7 કલાક જેટલો સમય ગાળી શકો છો. પરિવાર કે મિત્રો સાથે આવવા માટે આ પર્ફેક્ટ જગ્યા છે.
સમુદ્રની તાજી હવા અને પ્રકૃતિને નજીકથી માણવા માગતા હો તો લક્ષદ્વીપની મુલાકાત ચોક્કસથી લેવી. જો તમે સારી રીતે અહીં ફરવા માગતા હો તો ઓછામાં 4-5 દિવસની ટૂર પ્લાન કરો. બજેટ ફ્રેન્ડલી ટૂર પેકેજ માટે તમે ટ્રાવેલ એજન્ટની મદદથી પણ બુકિંગ કરાવી શકો છો.
