Sunday, July 14, 2024
HomeFeature04 જૂને લોકસભા ચૂંટણીનું પરિણામ, કેટલા સાચા પડશે એક્ઝિટ પોલ્સ?

04 જૂને લોકસભા ચૂંટણીનું પરિણામ, કેટલા સાચા પડશે એક્ઝિટ પોલ્સ?

ક્રિકેટ વર્લ્ડ કપની ફાઈનલ કરતાં પણ મોટા મુકાબલાનું પરિણામ આવવામાં હવે ફક્ત થોડા કલાકો જ બાકી છે. લોકશાહીના સૌથી મોટા પર્વની ઉજવણીનો દિવસ હવે થોડા જ ડગલાં દૂર છે. કોની મહેનત સફળ થશે અને કોની મહેનત એળે જશે તે જાણવા માટે આવતીકાલે એટલે કે 4 જૂન 2024ના રોજ મંગળવાર પર તમામ રાજકીય પક્ષો સહિત સમગ્ર દેશની નજર રહેલી છે. 4 જૂને સાત તબક્કામાં યોજાયેલી લોકસભા ચૂંટણી 2024નું પરિણામ જાહેર થવાનું છે. પરંતુ તે પહેલા અટકળોનું બજાર ગરમ છે. ગામડાઓ અને શહેરોના ખૂણે ખૂણેથી માંડીને સોશિયલ મીડિયાના વિવિધ પ્લેટફોર્મ પર દરેક જણ એકબીજાને પૂછી રહ્યા છે.

દેશમાં કોણ સત્તા પર આવી રહ્યું છે? જોકે, અત્યારે તો તમામ લોકો પાસે એક્ઝિટ પોલના ડેટાના આધારે જવાબ મળેલો જ છે. પરંતુ તેનો અસલી જવાબ મંગળવારે દેશને મળશે. લોકસભાની ચૂંટણી સાત તબક્કામાં યોજાઈ હતી, જે 19 એપ્રિલથી શરૂ થઈ હતી અને 1 જૂનના રોજ પૂરી થઈ હતી. જ્યારે એક્ઝિટ પોલ મુજબ ભાજપની આગેવાનીમાં NDA વિજયની હેટ્રિક લગાવી રહ્યો છે અને નરેન્દ્ર મોદી ત્રીજી વખત વડાપ્રધાન બનવા જઈ રહ્યા છે.

જોકે, એક્ઝિટ પોલ દરેક વખતે સાચા પણ નથી હોતાં એટલે 4 જૂનનો દિવસ વધારે મહત્વનો બની રહેવાનો છે. ભાજપે આ વખતે 400 પારનો લક્ષ્યાંક રાખ્યો હતો. એક્ઝિટ પોલમાં તેને 350થી વધુ બેઠકો મળશે તેવી આગાહી કરવામાં આવી રહી છે તેમ છતાં તે 400ને પાર પહોંચે તેવી શક્યતા નહિવત છે. બીજી તરફ કોંગ્રેસ અને વિરોધ પક્ષોના ગઠબંધનનું કહેવું છે કે એક્ઝિટ પોલ ગમે તે કહે પરંતુ ભાજપ આ વખતે હારશે અને દેશમાં સત્તા બદલાશે.

શું કહી રહ્યા છે એક્ઝિટ પોલ

પરિણામો પહેલા એક્ઝિટ પોલનો જાહેર કરવામાં આવ્યા હતા. એક્ઝિટ પોલ દ્વારા સર્વેના આધારે અંદાજ લગાવવામાં આવે છે કે દેશમાં કયો પક્ષ જીતશે અને કઈ પાર્ટી સરકાર બનાવવા જઈ રહી છે. વિવિધ એજન્સીઓના એક્ઝિટ પોલ ફરી એકવાર કેન્દ્રમાં એનડીએ સરકારની વાપસીનું સૂચન કરી રહ્યા છે. મેટ્રિસે ઉત્તર પૂર્વ ભારતના એક્ઝિટ પોલ જાહેર કર્યા છે.

પૂર્વોત્તર ભારતની આંતરિક મણિપુર બેઠક કોંગ્રેસના ખાતામાં જતી જોવા મળી રહી છે જ્યારે બાહ્ય મણિપુર લોકસભા બેઠક NPFના ખાતામાં જતી જોવા મળી રહી છે. અરુણાચલ પ્રદેશ અને ત્રિપુરાની પૂર્વ અને પશ્ચિમ લોકસભા બેઠકો ફરી એકવાર ભાજપ પાસે જતી જોવા મળી રહી છે. આ સિવાય મિઝોરમ સીટ ZPA, મેઘાલયની તુરા અને શિલોંગ સીટ NPP, નાગાલેન્ડ સીટ NDPP અને સિક્કિમ સીટ SDFને જતી જોવા મળી રહી છે. જો આસામની વાત કરીએ તો અહીં 14 સીટોમાંથી 9 સીટો ભાજપના ખાતામાં અને ત્રણ સીટો કોંગ્રેસના ખાતામાં જતી જોવા મળી રહી છે. આ સિવાય કોકરાઝાર સીટ UPPL અને બરપેટા સીટ AGP પાસે જઈ શકે છે.

એક્ઝિટ પોલમાં NDAને પૂર્ણ બહુમતી મળી છે

લોકસભા ચૂંટણીને લઈને વિવિધ એજન્સીઓ અને ન્યૂઝ ચેનલો દ્વારા જાહેર કરવામાં આવેલા એક્ઝિટ પોલમાં NDAને સંપૂર્ણ બહુમતી મળતી જોવા મળી રહી છે. એક્ઝિટ પોલના ડેટા અંગે, સરકારના કેટલાક નેતાઓ દાવો કરે છે કે આ એક્ઝિટ પોલ સચોટ સાબિત થશે, જ્યારે કેટલાક નેતાઓનો દાવો છે કે 4 જૂને પરિણામ જાહેર થયા બાદ એનડીએની બેઠકો વધુ વધશે. બીજી તરફ વિપક્ષી નેતાઓએ દાવો કર્યો છે કે એક્ઝિટ પોલના આંકડા ખોટા સાબિત થશે અને INDIA ગઠબંધન 295થી વધુ બેઠકો જીતીને સરકાર બનાવશે.

હિંસા રોકવાની પૂરતી તૈયારીઓઃ ચૂંટણી પંચ

લોકસભા ચૂંટણી 2024 માટે મતદાન સમાપ્ત થવાની સાથે ચૂંટણી પંચે સ્વીકાર્યું છે કે આવી ગરમીમાં ચૂંટણીઓ યોજવી જોઈએ નહીં. પંચના જણાવ્યા અનુસાર, તેમને આ ચૂંટણીમાંથી જાણવા મળ્યું છે કે ચૂંટણી એક મહિના પહેલા સમાપ્ત થવી જોઈએ. આ સાથે ચૂંટણી પંચે કહ્યું છે કે ચૂંટણી પછી હિંસા ન થાય તે સુનિશ્ચિત કરવા માટે પશ્ચિમ બંગાળ સહિત ઘણા રાજ્યોમાં અર્ધલશ્કરી દળો તૈનાત રહેશે.

જોકે આ અર્ધલશ્કરી દળો હવે રાજ્ય સરકારના નિયંત્રણ હેઠળ હશે. મતદાન દરમિયાન આપવામાં આવનાર ફોર્મ 17C સબમિટ કરવામાં ન તો કોઈ વિલંબ થયો છે કે ન તો કોઈ અનિયમિતતા. મુખ્ય ચૂંટણી કમિશનર રાજીવ કુમારે સોમવારે આ માહિતી આપી હતી. આ સાથે તેમણે કહ્યું હતું કે મત ગણતરીની સંપૂર્ણ વિડિયોગ્રાફી કરવામાં આવશે.

રાજકીય પક્ષોના એજન્ટોને મતગણતરી કેન્દ્ર પર બેસીને હકીકતો નોંધવાની સંપૂર્ણ સ્વતંત્રતા છે. પોસ્ટલ બેલેટની ગણતરી એ જ રીતે કરવામાં આવશે જે રીતે 2019થી વિવિધ ચૂંટણીઓમાં કરવામાં આવી રહી છે. સામાન્ય રીતે પોસ્ટલ બેલેટની સંખ્યા ઓછી હોય છે અને તેમની ગણતરી વહેલા પૂર્ણ થાય છે.

RELATED ARTICLES

Most Popular

Recent Comments

error: Content is protected !!