રાજકોટના TRP ગેમ ઝોનમાં આગ લાગવાના કારણે 12 બાળકો સહિત કુલ 24 લોકોના મોત નીપજ્યા છે. જોકે, હવે ધીમે ધીમે તંત્રની પોલ સામે આવી રહી છે. જેમાં સૌથી પહેલા તો આ ગેમ ઝોન પાસે ફાયર NOC ન હતું. લોકોના મનમાં હવે એક જ પ્રશ્ન છે કે આ ભયાનક દુર્ઘટનામાં જવાબદાર સામે શું પગલાં લેવામાં આવશે?
હાલ આખા દેશમાં રાજકોટના ગેમઝોનમાં લાગેલી આગના સમાચાર ચર્ચામાં છે, આ ઘટનામાં અત્યારસુધી 12 બાળકો સહિત 24 લોકોના મોત થયા હોવાનું જાણવા મળી રહ્યું છે અને આ મૃત્યુઆંક વધે તેવી શક્યતા જરાય નકારી શકાય તેમ નથી. આ ગેમઝોનમાં જીવતા જ ભૂંજાઈ ગયેલા બાળકો અને તેમના વાલીઓ વેકેશનમાં મજા કરવા માટે ગયા હતા, પરંતુ હવે તેઓ આ દુનિયામાં નથી રહ્યા.. ત્યારે શું આ ઘટનાને પણ માત્ર દુર્ઘટનામાં ખપાવી દેવી યોગ્ય ગણાશે કે પછી આ તમામ 24 લોકોની હત્યા થઈ છે તે કહેવું વધારે ઉચિત રહેશે? રાજકોટનો TRP ગેમઝોન આખા સૌરાષ્ટ્રનો સૌથી મોટો ગેમઝોન હતો જેમાં આગ લાગ્યા બાદ હવે સરકારે આખાય ગુજરાતમાં તમામ ગેમઝોન્સને બંધ કરી દેવાનો આદેશ આપ્યો છે. આ આદેશ ખરેખર તો રાંડ્યા પછીના ડહાપણથી પણ બદતર છે, કારણકે અત્યારસુધી રાજ્યમાં આવી અનેક ઘટના બની ચૂકી છે કે જેમાં પબ્લિક સેફ્ટીના નિયમોનો સરેઆમ ભંગ થવાને કારણે નિર્દોષોના મોત થયા હોય. 2019માં થયેલો તક્ષશિલા કાંડ, 2022માં થયેલી મોરબી બ્રિજ દુર્ઘટના, 2024માં થયેલી વડોદરાના હરણી તળાવની દુર્ઘટનામાં જો પબ્લિક સેફ્ટીના નિયમોનું પાલન થયું હોત તો તેમાં મોતને ભેટનારા નિર્દોષો આજે કદાચ જીવતા હોત. જોકે, ભૂતકાળમાં બનેલી આ તમામ ઘટના બાદ સરકારે માત્ર દેખાડો કરાતો હોય તેમ કાર્યવાહીનું નાટક કર્યું હતું, પરંતુ તેમાંથી જાણે કશોય બોધપાઠ નહોતો લીધો.
હાલના દિવસોમાં રાજ્યમાં કાળઝાળ ગરમી પડી રહી છે ત્યારે શોટ સર્કિટથી લઈને એસીના કોમ્પ્રેસર ફાટવાને કારણે આગ લાગવાની અનેક ઘટના બની રહી છે, પરંતુ શું રાજકોટના ફાયર ડિપાર્ટમેન્ટને એ ખબર નહોતી કે શહેરમાં આવેલો ગેમઝોન ફાયર NOC વિના જ ચાલી રહ્યો છે? શહેરની દરેક ઈમારતમાં ફાયર સેફ્ટીના નિયમોનું યોગ્ય રીતે પાલન થાય છે કે નહીં તેમજ ફાયર સેફ્ટી સિસ્ટમ યોગ્ય રીતે કામ કરે છે કે નહીં તે સુનિશ્ચિત કરવાની જવાબદારી ફાયર અને કોર્પોરેશનના અધિકારીઓની છે..
પરંતુ ફાયર NOC વિના જ આ ગેમઝોન કોના આશિર્વાદથી ધમધમતો થઈ ગયો હતો તેનો જવાબ આપણને કદાચ ક્યારેય નહીં મળી શકે, કારણકે મોટામાથાંની સંડોવણી વિના આટલી હિંમત કોઈ ના કરી શકે અને જ્યારે નિર્દોષોના જીવ જાય ત્યારે મોટામાથાં તેમાંથી આબાદ બચી જતા હોય છે.
મોરબીમાં બ્રિજ પડ્યો ત્યારે નગરપાલિકાએ એવું કહીને હાથ અદ્ધર કરી દીધા હતા કે આ બ્રિજ પરમિશન વિના જ જાહેર જનતા માટે ખૂલ્લો મૂકી દેવાયો હતો, પરંતુ બ્રિજ ખૂલ્લો મૂકી દેવાયા બાદ નગરપાલિકાને તેને ફરી બંધ કરાવતા કોણ રોકતું હતું તેનો જવાબ આજ દિન સુધી નથી મળી શક્યો. તેવી જ રીતે રાજકોટના TRP ગેમઝોનને પણ ફાયર NOC વિના જ શરૂ કરી દેવાયો હોવાનું હાલ જાણવા મળી રહ્યું છે, કેટલીક ન્યૂઝ ચેનલ્સ એવા વિઝ્યુઅલ્સ પણ બતાવી રહી છે કે જેમાં સ્પષ્ટ જોઈ શકાય છે કે ફાયર સેફ્ટીના સાધનો આ ગેમઝોનમાં પેટીપેક હાલતમાં જ પડ્યા હતા અને પાણીના પાઈપનું કનેક્શન પણ પંપો સાથે જોડવામાં નહોતું આવ્યું.
આ ગેમઝોન ક્યારથી શરૂ થયો હતો તેની કોઈ ચોક્કસ વિગતો જાણવા નથી મળી, પરંતુ ઈન્સ્ટાગ્રામ પર તેનું જે હેન્ડલ છે તેમાં બે અઠવાડિયા પહેલાનો એક વિડીયો જોઈ શકાય છે, મતલબ કે તેને શરૂ થયાને ઘણા દિવસો થઈ ગયા બાદ પણ જ્યાં રોજના સેંકડો લોકોની અવરજવર રહેતી હતી અને તેમાંય મોટી સંખ્યામાં જ્યાં બાળકો આવતા હતા તે જગ્યા પર ફાયર સેફ્ટીની કોઈ વ્યવસ્થા નથી અને તે ફાયર NOC વિના જ લોકોના જીવ સાથે રમત રમી રહી છે તેની તંત્રના અધિકારીઓને જાણ જ નહોતી? જો આ અધિકારીઓ આટલી વાતનું ધ્યાન પણ ના રાખી શકતા હોય તો શું તેમને માત્ર એસી ઓફિસોમાં બેસવાનો અને નેતાઓની જીહજૂરી કરવાનો જ પગાર લેવાનો છે?
TRP ગેમઝોનનો માલિક કોણ છે તે સવાલનો જવાબ આપતા રાજકોટના મ્યુનિસિપલ કમિશરને તેનું નામ કોઈ મિસ્ટર જાડેજા છે તેવું કહ્યું હતું, પરંતુ આ મિસ્ટર જાડેજાએ ગેમઝોનને બનાવીને તેનું સંચાલન બીજા કોઈને સોંપી દીધું હતું તેવી વાત પણ જાણવા મળી રહી છે, પરંતુ હાલ ગેમઝોનનો માલિક અને તેનો કહેવાતો કોન્ટ્રાક્ટર બંને ગાયબ છે, તેમાં આગ લાગી ત્યારે મીડિયા અને ફાયર બ્રિગેડવાળા પહોંચ્યા ત્યારે પણ ગેમઝોનના કોઈ કર્મચારી ત્યાં શોધ્યા નહોતા જડી રહ્યા. હાલ તો 24 નિર્દોષ લોકોના ભોગ લેનારી આ કાળજું કંપાવી દેનારી ઘટનાના ઉચ્ચ સ્તરે તપાસના આદેશ આપવામાં આવ્યા છે, પરંતુ તેમાં કોણ પકડાશે, કોણ ગુનેગાર ઠરશે અને કોને કેટલી સજા થશે તે માટે વર્ષો સુધી રાહ જોવી પડશે અને શક્ય છે કે તેમાંય કોઈને બલિનો બકરો બનાવી દેવાશે અને મોટી માછલીઓ આબાદ છટકી જશે.
