સૌરાષ્ટ્ર-દક્ષિણ ગુજરાતમાં વરસાદ, રાજકોટમાં 10 મિનિટમાં અડધો ઈંચ ખાબક્યો

(દિવ્યક્રાંતિ ન્યુઝ) તા.24-05-2022

હવામાન વિભાગની આગાહીને પગલે ગુજરાતમાં પ્રિ-મોન્સુન એક્ટિવિટી શરૂ થઈ ગઈ છે. દક્ષિણ ગુજરાત બાદ સૌરાષ્ટ્રના વાતાવરણમાં પલટો આવ્યો હતો. મંગળવારે રાજકોટ શહેરમાં પવન સાથે વરસાદ પડતા રસ્તાઓ પર પાણી ફરી વળ્યા હતા. મળતી માહિતી પ્રમાણે શહેરના ગોંડલ રોડ, ત્રિકોણ બાગ, ઢેબર રોડ અને રેસકોર્ષ સહિતના વિસ્તારોમાં વરસાદ પડતા વાતાવરણમાં ઠંડક પ્રસરી હતી. મીડિયા રિપોર્ટ અનુસાર માત્ર 10 જ મિનિટમાં અડધો ઈંચ જેટલો વરસાદ પડતા ચોમાસાની સીઝન શરૂ થઈ ગઈ હોય તેમ લાગી રહ્યું છે. વરસાદને કારણે લોકોને કાળઝાળ ગરમીથી આંશિક રાહત મળી છે. હવામાન વિભાગ દ્વારા હજી પણ 3 દિવસ સુધી વરસાદની આગાહી કરવામાં આવી છે.

10 મિનિટમાં અડધો ઈંચ વરસાદ પડ્યો

મીડિયા રિપોર્ટ અનુસાર રાજકોટના કુવાડવા રોડ પર સૌથી વરસાદ નોંધાયો છે. અહીં થોડી જ મિનિટોમાં અડધો ઇંચ વરસાદ નોંધાતા નીચાણવાળા વિસ્તારોમાં પાણી ભરાઇ ગયા હતા. આથી વાહનચાલકોને ભારે મુશ્કેલીનો સામનો કરવો પડ્યો હતો.

વરસાદ પડતાની સાથ જ વૃક્ષ ધરાશાયી

એટલું જ નહીં, પવન સાથે વરસાદ પડતા વૃક્ષ પડવાની ઘટના સામે આવી છે. બાપુનગર વિસ્તારની અંદર લીમડાનું વૃક્ષ ધરાશાયી થયું હતું. ત્યારબાદ તંત્ર દ્વારા રસ્તા પરથી વૃક્ષ હટાવવાની કામગીરી હાથ ધરવામાં આવી હતી. બીજી તરફ ઉનાળુ પાક તલ, બાજરી સહિતના પાકને નુકસાન જવાની ભીતિ સેવાઇ રહી છે.