સ્પેસ સાયન્સના ક્ષેત્રમાં ભારતની એક પ્રાઈવેટ કંપની ધીરે-ધીરે ઈતિહાસ રચવાની નજીક પહોંચી રહી છે. લગભગ 4 વર્ષ પહેલા બનેલી સ્કાયરુટ એરોસ્પેસ પ્રાઈવેટ લિમિટેડએ ભારતના પહેલા પ્રાઈવેટ રોકેટ વિક્રમ-1ના એન્જિનના ટેસ્ટિંગમાં મહત્વનો પડાવ સફળતાથી પાર કરી લીધો છે. વિક્રમ-1ના ત્રીજા સ્ટેજનું સફળ પરીક્ષણ નાગપુરમાં કરાયું. વિક્રમ-1ને આ વર્ષના અંત સુધીમાં લોન્ચ કરવાની યોજના છે.
વિક્રમ-1 રોકેટ એન્જિનના ત્રીજા તબક્કાનું ટેસ્ટિંગ આ મહિને 5 મેએ નાગપુરમાં સફળતાપૂર્વક કરાયું. જોકે, સ્કાયરૂટએ આ સફળ ટેસ્ટ અંગે 19મેએ જાહેરાત કરી હતી. વિક્રમ-1ના ત્રીજા તબક્કાના ટેસ્ટને ‘કલામ 100’ નામ અપાયું હતું. રોકેટ એન્જિને સ્ટેટિક ફાયર ટેસ્ટ દરમિયાન પૂર્ણ સમયને સફળતાપૂર્વક પૂરો કર્યો. થર્ડ સ્ટેજનો બર્ન ટાઈમ 108 સેકન્ડ રહ્યો.
વિક્રમ-1 એક નાનું લોન્ચ વ્હીકલ છે, જે 225 કિલોગ્રામ સુધીના પેલોડને સ્પેસમં 500 કિલોમીટરની ઉંચાઈ સુધી લોન્ચ કરી શકશે. તેનો હેતુ નાના સેટેલાઈટને લોન્ચ કરવાનો છે. આ લોન્ચ વ્હીકલનું નામ ઈન્ડિયન સ્પેસ અભિયાનના જનક કહેવાતા વિક્રમ સારાભાઈના નામ પર રખાયું છે. કંપની વિક્રમ સીરિઝના ત્રણ લોન્ચ વ્હીકલ બનાવી રહી છે. વિક્રમ 2 રોકેટનો પેલોડ 450 કિલોગ્રામ અને વિક્રમ 3નો પેલોડ 580 કિલોગ્રામ હશે.
ઈસરોના પૂર્વ એન્જિનિયર પવન ચંદાના અને નગા ભારત ડાકાએ 2018માં સ્કાયરૂટ એરોસ્પેસ પ્રાઈવેટ લિમિટેડ નામનું સ્ટાર્ટઅપ શરૂ કર્યું હતું. બંને આઈઆઈટીમાંથી ભણેલા છે. પવને આઈઆઈટી ખડગપુરમાં અને ડાકાએ આઈઆઈટી મદ્રાસમાં અભ્યાસ કર્યો છે. ઈસરોમાં પોતાના કાર્યકાળ દરમિયાન પવન ચંદાનાએ ભારતના સૌથી મોટા રોકેટ જીએસએલવી એમકે 3 જેવા મહત્વના પ્રોજેક્ટ્સ પર કામ કર્યું છે. બીજી તરફ ડાકાએ ઈસરોમાં ફ્લાઈટ કોમ્પ્યુટર એન્જિનિયર તરીકે બધા મહત્વના હાર્ડવેર અને સોફ્ટવેર પર કામ કર્યું છે. બંનેનું સપનું સ્કાયરૂટન ઈલોન મસ્કની સ્પેસએક્સની જેમ સ્પેસના ક્ષેત્રમાં જાણીતી કરવાનું છે.
સ્કાયરૂટ પહેલું એવું સ્ટાર્ટઅપ છે, જેણે ઈન્ડિયન સ્પેસ રિસર્ચ ઓર્ગેનાઈઝેશન (ISRO)ની સાથે રોકેટ બનાવવા માટે એમઓયુ કર્યા છે. કંપનીની નજર ટેલિકોમ્યુનિકેશન, સ્પેસ બ્રોડબેન્ડ જેવા સર્વિસ સેક્ટર પર છે. સ્કાયરૂટના સીઈઓ પવન ચંદાનાના જણાવ્યા મુજબ, વિક્રિમ સીરિઝના ત્રણે રોકેટને લોન્ચ કર્યા પછી કંપનીની યોજના ફરીથી ઉપયોગમાં આવી શકે તેવા રોકેટો બનાવવાની છે. તે ઉપરાંત કંપની સ્પેસ ટૂરિઝમમાં પણ એન્ટ્રી કરવા ઈચ્છે છે.
