ટૂંક સમયમાં વોટ્સએપમાં પણ જોવા મળશે Instagram અને iMessage જેવું આ ફીચર

(દિવ્યક્રાંતિ ન્યુઝ) તા.03-02-2022

આપણે સૌ જાણીએ છીએ કે વોટ્સએપ અને ફેસબુક મેટા કંપનીની માલિકી હેઠળ આવે છે. મેસેજિંગ અને કોલિંગ પ્લેટફોર્મ વોટ્સએપ અવારનવાર નવા-નવા ફીચર્સ લાવતું રહે છે. પ્રાપ્ત જાણકારી અનુસાર, વોટ્સએપ અત્યારે પણ નવા ફીચર્સ માટે ટેસ્ટિંગ કરી રહ્યું છે. WABetaInfo દ્વારા તાજેતરમાં એક રિપોર્ટ પ્રકાશિત કરવામાં આવ્યો છે, જે અનુસાર વોટ્સએપ અત્યારે એપલના આઈમેસેજ અને ઈન્સ્ટાગ્રામ મેસેજ જેવું એક ફીચર લાવવાની તૈયારી કરી રહ્યું છે.

આ રિપોર્ટમાં સ્ક્રીનશોટ પર શેર કરવામાં આવ્યા છે, જે જોતાં લાગે છે કે આ ફીચર લગભગ તૈયાર છે અને ટૂંક સમયમાં યુઝર્સ સુધી પણ પહોંચી જશે. ઉલ્લેખનીય છે કે મેટા કંપનીએ પોતાના અન્ય પ્લેટફોર્મ પર તો આ ફીચર મૂક્યું જ છે. તમે મેસેન્જર અને ઈન્સ્ટાગ્રામમાં આ ફીચર જોઈ શકો છો. પરંતુ હવે વોટ્સએપના યુઝર્સ પણ તેનો ઉપયોગ કરી શકશે.

જે લોકોને આ ફીચર વિષે જાણકારી ન હોય તેમને જણાવી દઈએ કે, મેસેજ રિએક્શનની મદદથી તમે જે તે મેસેજને ક્લિક કરી શકો છો અને પછી ત્યાં પોપ થતા વિવિધ રિએક્શન પર ક્લિક કરી શકો છો. જેમ કે, સેડ, સ્માઈલ, સરપ્રાઈઝ, થમ્બ્સ અપ વગેરે જેવા ઈમોજી ત્યાં આપવામાં આવે છે. આ એવા ઈમોજી હોય છે જેનો ઉપયોગ મોટાભાગે આપણે કરતા હોય છે. જેમ કે મોટાભાગે આપણે કોઈ મેસેજના જવાબમાં અંગૂઠાનું ઈમોજી, અથવા સ્માઈલી મૂકતા હોઈએ છીએ.

આ પહેલા પણ વોટ્સએપ માટે આ ફીચરનો ઉપયોગ કરવામાં આવ્યો હતો. પરંતુ તે વખતે તે પ્રાથમિક તબક્કામાં હતું. પરંતુ હવે લાગી રહ્યું છે કે કંપનીએ ટેસ્ટિંગ કરીને ફીચરને ઉપયોગ માટે તૈયાર કરી લીધું છે. બેટા વર્ઝનમાં પણ આ ફીચરને ટેસ્ટ કરવાની શરુઆત ટૂંક સમયમાં થઈ શકે છે. સ્ક્રીનશોટ પરથી લાગી રહ્યું છે કે, મેસેજ પર ક્લિક કરતાની સાથે છ ઈમોજી દર્શાવવામાં આવશે- થમ્બ્સ અપ, હાર્ટ, ખુશીના આંસુ વાળો ચહેરો, આશ્ચર્ય, રડતો ચહેરો અને હાથ જોડવા વાળું ઈમોજી.