કેન્દ્ર સરકાર અને ટ્વિટર વચ્ચેની મડાગાંઠ હજી ઉકેલાઈ નથી. હવે કેન્દ્ર સરકારે માઈક્રો બ્લોગિંગ સાઈટ ટ્વિટરને અંતિમ ચેતવણી આપી છે કે તે નવા ડિજિટલ નિયમોને તાત્કાલિક ધોરણે લાગુ કરે નહીંતર ગંભીર પરિણામો ભોગવવા પડી શકે છે. આ પહેલા ટ્વિટરે શનિવારે આરએસએસ પ્રમુખ મોહન ભાગવત સહિત ત્રણ મોટા નેતાઓનું ટ્વિટર એકાઉન્ટ અનવેરિફાઈડ કરી દીધું હતું. આ ઉપરાંત ઉપરાષ્ટ્રપતિ વેંકૈયા નાયડુના પર્સનલ એકાઉન્ટ પરથી બ્લૂ ટિક હટાવી દીધું હતું. જોકે બાદમાં ટ્વિટરે બ્લૂ ટિક ફરીથી લગાવી દીધું હતું.
મિનિસ્ટ્રી ઓફ ઈલેક્ટ્રોનિક્સ એન્ડ ઈન્ફોર્મેશન ટેક્નોલોજીના ગ્રૂપ કોર્ડિનેટર રાકેશ મહેશ્વરી દ્વારા 5 જૂને ટ્વિટરને પત્ર લખવામાં આવ્યો હતો જેમાં કહેવામાં આવ્યું હતું કે ટ્વિટરના પત્રમાં નવા ડિજિટલ નિયમોને લાગુ કરવા અંગે કોઈ સ્પષ્ટીકરણ પણ આપવામાં આવ્યું ન હતું અને તેને અમલી પણ બનાવવામાં આવ્યા નથી.
મંત્રાલયે નવા ડિજિટલ નિયમો અંગે 26 મે 2021 અને 28 મે 2021એ લખેલા પત્રમાં લખ્યું હતું કે ટ્વિટરે આજ સુધી કોમ્પ્લાયન્સ ઓફિસર, ફરિયાદ નિવારણ અધિકારી અને નોડલ ઓફિસરનું વિવરણ આપ્યું નથી. પત્રમાં કહેવામાં આવ્યું છે કે ટ્ટિવરનું ઓફિસ એડ્રેસ પણ એક લો ફર્મનું છે જે નિયમોને અનુકૂળ નથી.
મંત્રાલયે પોતાના પત્રમાં સ્પષ્ટ રીતે કહ્યું છે કે જો ટ્વિટર નવા ડિજિટલ નિયમો નહીં માને તો IT એક્ટ 2000ની કલમ 79 અંતર્ગત તેનો ઈન્ટરમીડિયરીનો કાયદાકિય દરજ્જો ખતમ કરી શકાય છે. પત્રમાં આગળ લખવામાં આવ્યું છે કે ભારતના લોકો જે ટ્વિટર પ્લેટફોર્મ ઉપયોગ કરે છે તેમને પારદર્શી મિકેનિઝમનો અધિકાર છે. જેથી તેમની ફરિયાદોનું યોગ્ય નિવારણ આવી શકે.
મંત્રાલયે પત્રમાં કહ્યું છે કે ભારત સૌથી મોટો લોકશાહી દેશ છે. ટ્વિટરને અહીં ખુલ્લા મને આવકારવામાં આવ્યું છે પરંતુ દસ વર્ષથી અહીં કામ કરતું હોવા છતાં ટ્વિટર એવું કોઈ મિકેનિઝમ બનાવી શક્યું નથી જેનાથી ભારતના લોકો ટ્વિટર અંગે પોતાની ફરિયાદોનું નિવારણ લાવવાની તક મળી શકે. જે લોકોને ટ્વિટરના પ્લેટફોર્મ પર અપશબ્દોનો સામનો કરવો પડે છે અથવા ધમકીઓ મળે છે તેમને પોતાની ફરિયાદના સમાધાન માટે મિકેનિઝમ મળવું જોઈએ. પત્રમાં કહેવામાં આવ્યું છે કે ટ્વિટરને 26 મે 2021થી જ નિયમો માનવા પડશે.
હવે ટેલિગ્રામ પર મેળવો મહત્વના સમાચાર, અમારી ટેલિગ્રામ ચેનલને સબ્સ્ક્રાઇબ કરવા ક્લિક કરો
