આજથી કેરળમાં ચોમાસાનું આગમન થયું છે જેના કારણે પ્રિ મોન્સૂન એક્ટિવિટી શરૂ થતા ગુજરાતમાં પણ તેની શરૂઆત થઈ ચૂકી છે. આજે વહેલી સવારથી જ ગુજરાતના અનેક જિલ્લાઓમાં વાવાવરણમાં પલટો જોવા મળ્યો છે. અમદાવાદ, ગાંધીનગર, વડોદરામાં પણ વહેલી સવારથી જ વાદળછાયું વાતાવરણ જોવા મળી રહ્યું છે તો મોડી સાંજે બાદ કેટલાક વિસ્તારોમાં ઝરમર વરસાદ પણ પડ્યો હતો.
ગુજરાતમાં છેલ્લા 24 કલાકમાં 35 તાલુકામાં નોંધપાત્ર વરસાદ પડ્યો છે. જેમાં બનાસકાંઠાના દાંતામાં અઢી ઈંચ વરસાદ પડ્યો છે, જ્યારે વડાલી, પોશીના, બાલાસિનોરમાં એક-એક ઈંચ, શહેરા, ખેડબ્રહ્મા, સતલાસણામાં અડધો ઈંચ વરસાદ પડ્યો છે. આ સાથે ઉત્તર અને મધ્ય ગુજરાતમાં વરસાદી માહોલ બરાબરનો જામ્યો છે. રાજ્યમાં પ્રિ-મોનસૂન એક્ટિવિટીના ભાગરૂપે ઉત્તર ગુજરાતના કેટલાક જિલ્લામાં મોડી રાતે વરસાદ વરસ્યો છે. સાબરકાંઠા જિલ્લાના અલગ અલગ શહેરોમાં ભારે પવન અને ગાજવીજ સાથે વરસાદ વરસ્યો છે. હિંમતનગર, ઈડર, ખેડબ્રહ્મા અને વડાલી પંથકમાં ભારે પવન અને ગાજવીજ સાથે વરસાદ વરસ્યો છે. ભારે પવન સાથે વરસાદ વરસતા રોકડિયા પાકોને મોટું નુકસાન થવાની ભીતી સેવાઈ રહી છે. ઉનાળુ પાકને નુકસાનીની ભીતીને લઈને ખેડૂતો પણ ચિંતિત થયા છે. ગુજરાતમાં પ્રિ- મોન્સૂન એક્ટિવિટી શરૂ થઈ છે જેના કારણે રાજ્યના અનેક જિલ્લામાં વરસાદી માહોલ જામ્યો છે. આજે ઉત્તર ગુજરાતના અનેક તાલુકા-જિલ્લામાં ગાજવીજ સાથે વરસાદ પડ્યો છે. બનાસકાંઠા, અરવલ્લી, સાબરકાંઠા, મહેસાણા, પંચમહાલમાં વરસાદી માહોલ જોવા મળી રહ્યો છે. ગાંધીનગરના માણસામાં પણ પવન સાથે વરસાદ પડ્યો છે. દાહોદમાં વરસાદ વચ્ચે મેઘધનુષ્યનો અદ્દભૂત નજારો જોવા મળ્યો છે. આ સિવાય મોડાસા, મેઘરજ, ભિલોડા, બાયડ, ધનસુરા, શામળાજીમાં પવન સાથે વરસાદ પડ્યો છે. મહેસાણાના બહુચરાજીમાં પણ વરસાદ છે.
અરવલ્લી જિલ્લાના મોડાસા, મેઘરજ, બાયડ, ધનસુરા, માલપુર, ભિલોડમાં વહેલી સવારે ભારે પવન અને ગાજવીજ સાથે વરસાદ ખાબક્યો હતો. જેને લઇ વાતાવરણમાં અતિશય બફારા વચ્ચે આશિક રાહત અનુભવાઈ હતી. બીજીબાજુ ખેડૂતોમાં પણ ચિંતાનો માહોલ જોવા મળ્યો હતો. ખેડૂતોના ઉભા પાકને નુકશાન થવા પામ્યું હતું. ભારે પવનને કારણે બાજરી અને જારના પાકનો સોથ વળી જવા પામ્યો છે. જારનો કાપણી કરેલ પાક ભીનો થઈ જવા પામ્યો હતો.
ખેડા જિલ્લામાં પણ ગાજવીજ સાથે વરસાદ થયો છે. ખેડા જિલ્લાના ગળતેશ્વર, સેવાલિયામાં પવન સાથે વરસાદ છે. ભારે પવન ફૂંકાતા વીજળી ગુલ થવાના પણ સમાચાર મળી રહ્યા છે. આજે એકાએક ખેડા જિલ્લાના વાતાવરણમાં પલટો આવ્યો હતો. ગળતેશ્વર તાલુકા સેવાલીયામાં પરોઢથી પવનની લહેર સાથે મેઘરાજાનું આગમન થયું છે. ભારે પવનો વાતો વૃક્ષો બિહામણા અવાજ સાથે ડોલ્યા હતા. વાદળોના ગડગડાટ અને વીજળીના કડાકાથી વાતાવરણ ગુંજયું હતું. ધીમીધારે વરસાદ શરૂ થતાં ગરમીથી આંશિક રાહત અનુભવાઈ રહી છે.
બનાસકાંઠાના દાંતામાં પણ વરસાદ જોવા મળી રહ્યો છે. બનાસકાંઠાના દાંતામાં આજે ગાજવીજ અને પવન સાથે વરસાદ પડ્યો છે. વરસાદથી ખેડૂતોમાં ચિંતા પ્રસરી જવા પામી છે. દાંતામાં રાત્રીના સમયમાં ફુલ વરસાદ પડ્યો છે. વિજળીના કડાકા ભડાકા સાથે વરસાદ થયો હોવાનો સમાચાર છે. અચાનક આવેલા વરસાદથી ઠંડક પ્રસરી ગઈ છે. બીજી બાજુ કમોસમી વરસાદથી ખેડુતોની ચિંતામાં વધારો થયો છે.
સૌરાષ્ટ્રમાં શુકન વર્તાય છે: હવામાન વિભાગ દ્વારા ઉત્તર ગુજરાત, મધ્ય ગુજરાત સહિત સૌરાષ્ટ્ર અને દક્ષિણ ગુજરાતમાં પણ વરસાદની આગાહી કરવામાં આવી રહી છે. ગુજરાતને અનેક જિલ્લાઓમાં પ્રિ-મોન્સૂન એક્ટિવિટીની અસર જોવા મળી રહી છે જેના ભાગ રૂપે અમદાવાદમાં ભારે વહેલી સવારે ભારે પવન ફુંકાયો તો અને વાતાવરણમાં પલટો આવી જતા વરસાદી માહોલ સર્જાયો હતો.
હવે ટેલિગ્રામ પર મેળવો મહત્વના સમાચાર, અમારી ટેલિગ્રામ ચેનલને સબ્સ્ક્રાઇબ કરવા ક્લિક કરો
