કોરોના પછી લગભગ તમામ દર્દીને અશક્તિની ફરિયાદ હોય છે. સોશિયલ મીડિયા પરના અધ્ધરતાલ નુસખા અજમાવવા કરતા આ વસ્તુઓને ખોરાકમાં શામેલ કરો…
દેશભરમાં કોરોનાના સક્રિય કેસની સંખ્યા સતત વધી રહી છે. કોરોનાથી સંક્રમિત થયેલા લોકો મોટી સંખ્યામાં સ્વસ્થ પણ થઈ રહ્યા છે. પરંતુ કોરોનાથી સાજા થનારા લોકો મોટા ભાગે અશક્તિની ફરિયાદ કરતા હોય છે. થાક દૂર કરવા અને ઈમ્યુનિટી વધારવાના સેંકડો નુસખા તમને ઈન્ટરનેટ પર જોવા મળશે. પરંતુ જો તમારે કોઈ સત્તાવાર સ્ત્રોત પર ભરોસો કરવો હોય તો ભારત સરકારની વેબસાઈટ MyGovIndiaએ પોતાના ટ્વિટર હેન્ડલ પર પાંચ એવા આહારની જાણકારી આપી છે, જેનાથી ઈમ્યૂનિટી વધે છે અને કોરોના પછીની અશક્તિ પણ દૂર થાય છે
1. પલાળેલી બદામ અને દ્વાક્ષ- દિવસની શરૂઆત પલાળેલી બદામ અને દ્વાક્ષ ખાઈને કરો. બદામમાં પૂરતા પ્રમાણમાં પ્રોટીન હોય છે અને દ્વાક્ષ શરીરને આયર્ન પૂરું પાડે છે. માટે નિયમિત ધોરણે પલાળેલી બદામ અને દ્વાક્ષનું સેવન ફાયદાકારક છે.
2. રાગી ઢોંસા અને દલિયા- થાક દૂર કરવા માટે રાગી ઢોંસા અથવા એક વાટકી દલિયાનું સેવન શ્રેષ્ઠ વિકલ્પ છે. સવારના સમય માટે આ પોષણક્ષમ આહાર છે. આનાથી શરીરને એનર્જી મળે છે.
3. ગોળ અને ઘી- લંચ દરમિયાન અથવા પછી ગોળ અને ઘીનું સેવન કરવું ફાયદાકારક સાબિત થઈ શકે છે. પોષકતત્વોથી ભરપૂર આ કોમ્બિનેશનને તમે રોટલી સાથે પણ ખાઈ શકો છો. ઝડપથી રિકવર થવામાં તે મદદ કરે છે. ગોળ અને ઘી બન્ને શરીરને ગરમ અને મજબૂત રાખવામાં મદદ કરે છે. તેમાં ઈમ્યુનિટી વધારવાના ગુણ પણ ઉપલબ્ધ હોય છે.
4. ખિચડી- કોરોનાથી સ્વસ્થ થયા પછી રાતનું ભોજન વધારે ભારે ના લેવું જોઈએ. ડિનર માટે ખિચડી યોગ્ય વિકલ્પ છે. ખિચડીમાં તમામ પ્રકારના જરૂરી પોષક તત્વો હોય છે અને તે પેટ માટે હળવો ખોરાક છે. ખિચડી ખાવાથી ઊંઘ પણ સારી આવે છે.
5. શરીરને હાઈડ્રેટ રાખવું અત્યંત જરૂરી છે. પૂરતા પ્રમાણમાં પાણી પીવાની સાથે ઘરે બનાવવામાં આવેલ લીંબુ પાણી અથવા છાશનું નિયમિત સેવન કરો. આનાથી તમે તરોતાજા થઈ જશો અને શરીરમાં જમા ઝેરીલા પદાર્થ બહાર નીકળી જશે.
આ સિવાય નિષ્ણાંતોનું કહેવું છે કે સ્ટ્રોબરી, રાસબરી અથવા જાંબુ વગેરેમાં પૂરતા પ્રમાણમાં એન્ટી ઓક્સિડન્ટ અને વિટામીન સી, કૉપર, ફોલેટ વગેરે હોય છે. આ ફળોને પણ તમે રોજના આહારમાં શામેલ કરી શકો છો.
હવે ટેલિગ્રામ પર મેળવો મહત્વના સમાચાર, અમારી ટેલિગ્રામ ચેનલને સબ્સ્ક્રાઇબ કરવા ક્લિક કરો
