રાજ્યમાં કોરોના દર્દીઓને હોસ્પિટલમાં દાખલ થવામાં જે મુશ્કેલીઓ પડી રહી છે તેને લઈને લોકોના મનમાં જે ગુસ્સો ભરાયેલો છે તેનો પડઘો નાયબ મુખ્યમંત્રી નીતિન પટેલને કોરોના બાદ દાખલ કરાતા સોશિયલ મીડિયામાં પડ્યો હતો. રાજ્યના આરોગ્ય મંત્રીનો હવાલો પણ સંભાળતા નીતિનભાઈને કોરોનાના હળવા લક્ષણો બાદ યુ.એન. મહેતામાં દાખલ કરવામાં આવ્યા હતા. જ્યારે કોરોનાના હળવા લક્ષણોમાં જ નાયબ મુખ્યમંત્રીને તાત્કાલિક બેડ મળી ગયો અને સારવાર શરુ થઈ ગઈ ત્યારે લોકોએ સોશિયલ મીડિયામાં ટીકાનો મારો ચલાવ્યો હતો. જેમાં આટલી માહામારીમાં 108માં હોસ્પિટલે ગયા વગર પણ ખાટલો મળી ગયો તે સારું કહેવાય તે મુદ્દો મુખ્ય રહ્યો હતો.
નેતાઓ, આઈએએસ-આઈપીએસ અધિકારીઓ, હોસ્પિટલના કેટલાક ઉચ્ચ પદાધિકારીઓના નજીકના લોકોને હોસ્પિટલમાં બેડ અને યોગ્ય સારવાર મળી જાય છે. જે બાબતે લોકોમાં ભારે રોષ જોવા મળી રહ્યો છે. જ્યારે રાજ્યની સામાન્ય પ્રજાને કલાકો સુધી એમ્બ્યુલન્સ માટે રાહ જોવી પડે છે. હોસ્પિટલ પહોંચીને પણ દાખલ થવા માટે રાહ જોવી પડે છે. તેવામાં જો ઓક્સિજન ન હોય તો બીજી હોસ્પિટલ કે બેડ શોધવા માટે રખડવું પડે છે. આ તમામ બાબતે લોકોએ નીતિનભાઈના ટ્વિટર હેન્ડલ અને સોશિયલ મીડિયા પર આકરી પ્રતિક્રિયા આપી હતી. આવી કેટલીક પ્રતિક્રિયા જોઈએ તો ખબર પડે કે રાજ્યમાં હાલ પ્રજાનો મૂડ શું છે.
એક યુઝરે લખ્યું ‘માનનીય સાહેબ સામાન્ય લક્ષણોની સારવાર તો ઘરથી જ થઈ જાય છે. તો ખોટો બેડ રોકવાનું શું કામ? કોઈ સીરિયસ દર્દીને તમારો બેડ આપશો તો સારા આશિર્વાદ મળશે’ તો કોઈ અન્ય યુઝરે કટાક્ષ કરતા કહ્યું કે, ‘અમે આશા રાખીએ છીએ કે તમને સમયસર ઓક્સિજન મળી જાય અને ઇન્જેક્શન પણ મળી જાય.’ તો કોઈએ લખ્યું ‘સવારે રિપોર્ટ કરાવ્યો, સાંજે આવી ગયો અને તરત હોસ્પિટલમાં એડમીટ… બોલો છે ક્યાંય વેઇટિંગ…. આ બધા ખોટી અફવાઓ ફેલાવે છે.’
લોકોના આ વ્યંગ્ય અને ગુસ્સાને સોશિયલ મીડિયા પર વાચા મળે છે. એક તરફ જ્યાં સામાન્ય લોકોને રુપિયા અને સમય બંને બરબાદ કર્યા પછી પણ જે હક્ક છે તે સુવિધા મળતી નથી બીજી તરફ નેતાઓને મળતી વિશેષ સુવિધાથી સમગ્ર સિસ્ટમ સામે સવાલ ઉભો થાય છે કે નેતા અને અફસરો તમામ નિયમોથી પરે હોય છે કે શું? જો નિયમો બધા માટે સરખા હોય તો પછી આવો ભેદભાવ શા માટે? ખેર આ સવાલોના જવાબ તો ક્યારેય મળ્યા નથી અને મળશે પણ નહીં.
હવે ટેલિગ્રામ પર મેળવો મહત્વના સમાચાર, અમારી ટેલિગ્રામ ચેનલને સબ્સ્ક્રાઇબ કરવા ક્લિક કરો
